|
Misyon Entènasyonal kap Evalye Eleksyon yo ann
Ayiti deplòtonnen plis pase 130 obsèvatè nan
tout depatman peyi a nan kad eleksyon 21 avril 2006 yo
Pòtoprens, madi 18 avril 2006 – Depi
yo fin rive nan peyi Dayiti samdi 15 avril la, plis pase 130
obsèvatè entènasyonal pou yon ti bout tan
Misyon Entènasyonal Kap evalye Eleksyon yo ann Ayiti (MIÉÉH),
deplòtonnen nan dis (10) depatman Repiblik la, nan kad
dezyèm tou eleksyon palmantè yo (depite ak senatè)
kap fèt vandredi 21 avril 2006 la. Misyon an deplòtonnen
nouvo ekip obsèvatè sa yo sou teren an kote yo
pral travay ak 20 obsèvatè ki te nan Peyi Dayiti
depi mwa septanm lane pase epi kap rete yo menm jouk nan bout
pwosesis elektoral la. Misyon an genyen pi gwo ekip obsèvatè entènasyonal
kap evalye eleksyon yo ann Ayiti.
Depi yo te fin rive samdi ki sot pase la a, obsèvatè sa
yo ki soti Kanada, nan peyi CARICOM yo ak Japon te resevwa pandan
de (2) jou yon fòmasyon djanm. Fòmasyon sa a kouvri
tout aspè misyon yo sou teren an ak tout etap yo dwe
swiv pou evalyasyon pwosedi elektoral la nan kad dezyèm
tou eleksyon palmantè yo sou tout teritwa nasyonal la,
premye tou eleksyon senatorayal kap refèt nan Nòdès
ak eleksyon pou depite nan 14 sikonskripsyon.
Misyon Entènasyonal kap Evalye Eleksyon yo ann Ayiti
gen manda pou obsève epi evalye tout pwosesis la ki kouvri
eleksyon prezidansyèl, palmantè (senatè ak
depite), lokal ak eleksyon minisipal yo. Misyon an gen alatèt
li yon komite 8 moun ki reprezante enstitisyon elektoral endepandan
nan 8 peyi ki se Brezil, Chili, Kanada, Jamayik, Lèzetazini,
Meksik, Panama ak Repiblik Dominikèn. Se direktè Eleksyon
Kanada, Jean Pierre Kingsley kap dirije komite sa a.
Depi mwa Dawout lane pase, Misyon an ap travay sou teren an
kote l jwenn jwenn sipò yon ekip espesyalis ak obsèvatè,
ki la pou tout pwosesis elektoral la, sa ki pèmèt
nou tabli baz nesesè pou nou reyalize manda nou. «Se
gras ak kontribisyon ak konpetans yo nou fenk rive mete deyò yon
rapò ki konplete obsèvasyon nou te fè nan
kad eleksyon 7 fevriye 2006 yo». Se sou sa prezidan
komite direktè Misyon an, Jean-Pierre Kingsley ensiste.
Rapò sa a prezante divès rekòmandasyon
nan objektif pou amelyore pwosesis elektoral la pou dezyèm
tou eleksyon yo. Konsèy Elektoral Pwovizwa a (KEP) deja
adopte anpil nan rekòmandasyon sa yo. «Ak obsèvatè pou
yon ti bout tan yo ki vini epi ki deplòtonnen
sou teren an, nou lanse yon lòt faz enpòtan nan
pwosesis obsèvasyon ak evalyasyon pwosesis elektoral
la ann Ayiti.
Misyon an deplòtonnen obsèvatè li yo nan
kolaborasyon ak lòt Misyon obsèvasyon tankou IFES,
Gwoup peyi Ewòp yo ak Gwoup peyi Frankofòn yo.
Sa bay asirans obsèvasyon pwosesis elektoral la pral fèt
tout bon sou tout teritwa a. Obsèvatè Misyon an
yo pral vizite diferan sant vòt nan tout depatman peyi
a pou yo kapab swiv jan biwo yo ap louvri, jan vòt la
ap dewoule, jan depouyman an ap fèt ak jan premye rezilta
yo pral pibliye.
Nan kad manda yo, obsèvatè ki sou lobedyans Misyon
an pral fè travay yo san paspouki epi san enjerans nan
pwosesis elektoral la.
Misyon an pral pibliye nan semenn kap vini la yo, divès
lòt rapò sou eleksyon 21 avril yo, ak yon rapò final
nan yon dat yo poko chwazi nan fen Misyon an nan peyi Dayiti.
Pou plis ransèyman, kominike ak :
Jasmine VENDREDI
Rapò ak laprès – (509) 414-4778
Robert B. Lussier
Konseye, Relasyon ak medya entènasyonal – (509)
455-0826.
|
